八號風球下的家中崇拜

八號風球，同老公風風在家崇拜。先唱«主在聖殿中»，然後選了耶利米書10：12-13作宣告。遇上鄰居開門，風風即刻走去門口串門子，然後回來時踢翻cindy盤水：因為我要即刻返來崇拜，咪踢跌cindy盤水囉。

詩歌唱了«讚美我上主»，"good morning God" 和輪唱«歡欣»。全是風風識唱的歌，也不用看歌詞。

我講了約拿被魚食咗的故事，風風聽到好入神。最後唱埋«願主賜福保護你»。崇拜結束。又去玩玩具了。

唔沖涼的原因

風風：我知道爸爸返工好辛苦，所以讓爸爸沖涼先。我唔沖住。我真係好愛爸爸嫁。

明明係自己掛住食提子唔肯沖涼。呢頭愛爸爸，嗰頭唔留提子俾爸爸。説好的一人一半呢？

念念不忘

晚飯開始，風風已經説飯後食雪糕。我一早聲明不一定每晚都有得食。成餐飯她間中就提起飯後食雪糕。我和老公都堅持未必有。

飯快吃完，開始收碗。風風留起匙羹，說：陣間可能食雪糕用。我繼續說無。食完飯，我叫她抹嘴。她把毛巾放到枱上：陣間可能食完雪糕都要抹嘛。

事到如此，到底她真心不明，定認為訴求多講幾次，必有迴響呢？

到爸爸説收枱喇，並開始行動。風即刻激動問：仲咩收枱？未食雪糕！不讓爸爸收枱﹙使用暴力？﹚，然後想扭計扮喊，叫了一聲。

最最後，爸爸決定拿雪糕出來解決問題。

可惜現實中下一代吶喊不一定被聽見。

哲學家

晚飯時，無聊談天。

我：風風，我覺得你係哲學家
風：我唔係哲學家，我係中學家。
﹙然後她拿起筷子在這隻汁碟打圈﹚
風：呢個係哲學家圓圈﹙筷子順時針攪﹚，呢個係中學家圓圈﹙逆時針攪﹚。所以我唔係哲學家，我係中學家。
爸：佢果然係哲學家，講既野都聽唔明

全部都係爸爸爸

近期風風又會開聲領禱。今晚禱文如下：

親愛既天父，多謝你俾我有好心情。今日爸爸帶我去公園玩，帶我返屋企。爸爸去咗開會。……爸爸負責煮飯。爸爸頭先拎個煲出來，好大聲嚇親我。我想喊，但又好肚餓。唔知喊先定食野先。我都係決定食野先，因為好肚餓…唔…多謝天父我好開心…求主潔淨食物，奉主耶穌名而求，阿門。

後記：飯後我問風，你宜家食飽唔肚餓，可以喊喇。

風：﹙想了一會﹚都係唔喊了。因為食咗好美味既食物，唔駛喊。

收埋爸爸本雜誌

一日，我拿著最後一期印刷版飲食男女睇，風風等到不耐煩，就搶走了。晚上，老公回家。我又叫他睇某某頁，正當他要拿之際，風風又搶先一步拿走，就是怎麽都不給看。

第二日，老公忽然又想拿來看，但就是找不到。我說不知道呀。風風竟然笑笑口，我收埋咗。等我搵俾你。

然後，老公尾隨她入房，她找找找，終於把雜誌拿出來，正是我們指定的一本。

老公﹙笑到忍唔到﹚：佢收埋咗本雜誌係衣櫃。

禁果與生仔

同風風講阿當夏娃偷食禁果，被趕出伊甸園。風：點解無得留係伊甸園？
我：因為佢哋食咗棵唔食得的果子
風：點解唔食得？﹙呢個係千古難題﹚
我：天父話唔食得
風：食得，所有都食得😵

又另一日。

風：點解雅各有12個仔？
我：因為天父俾好多祝福佢
風：點解天父俾好多祝福佢？
我：唔…唔知呀，可能佢聽話？
風：係咪佢無食﹙伊甸園﹚啲果子呀？

月亮好珍貴

風：睇下？月亮呀！
我：係喎，好靚好圓呀！﹙在廳中已見到銀白色滿月﹚
風：係呀！好珍貴嫁。
我，爸：係呀，好靚呀
風：好珍貴嫁，要二百幾千蚊嫁。

佢之後話，我(媽媽)隻腳好珍貴，值二百幾千蚊，賣咗佢

跟煮野

一日有兩個朋友仔同風風玩，走時媽媽叫他們去厠所後才走。翌日同風出門口，諗住俾啲朋輩壓力她。
我：昨日A和B都係出街前去厠所喎，你去啦
風：我唔跟佢哋嫁。我跟"煮野"
我："煮野"同厠所有咩關係？
風："煮野"即係主耶穌

你肯定早過媽媽講呢啲說話。