畫家

風：我叫畫家
我：哦，hello畫家豬妹
風：唔係畫家豬妹，係畫家。主耶穌幫我改既
我：哦………

風風遇上掃羅

今日崇拜暨聖餐主日，風風非常留心講台訊息，經文是掃羅在大馬色路上遇見耶穌，而且有許多問題和回應。經文是掃羅在大馬色路上遇見耶穌，並且暫時失明及獲得醫治的事。雖無辦法原文直錄，只能記得幾多寫幾多。

﹙台上講起掃羅和保羅﹚
風：掃羅即係保羅。
我：係呀。
風：點解佢唔同名？
我：因為佢之前做錯事，反省後做啱事就改名叫保羅。
風：點解之前係掃羅？
我：佢一出世爸爸媽媽同佢改名叫掃羅。到佢做識咗主耶穌做啱事就自己改名。
風：即係好似我一出世叫風風，返咗幼稚園就叫xx風﹙全名﹚。
我：唔係，你一出世就係呢個名
﹙重覆討論掃羅保羅個名好多次﹚

﹙台上話掃羅捉信徒坐監，打佢哋﹚
風：點解佢捉住耶穌門徒？耶穌既門徒係做啱事，唔會做錯事，佢唔應該捉佢哋，咁係唔啱嫁
我：係呀，唔啱嫁，佢嗰時唔知道自己做錯
風：係囉，耶穌既門徒係做啱事嘛，掃羅真係唔啱。﹙重覆好多次，風係好怕好人坐監的﹚我哋返屋企係個交叉同剔俾掃羅同保羅。
我：哦，好呀。

風：陣間有奉獻
我：未係，今日有聖餐，之後先係奉獻
風：我見到有奉獻袋
我：﹙本來想話台上無，然後見到聖餐袋有﹚係喎，我都見到奉獻袋
風：我都話有啦。我話陣間有奉獻，無話即刻係

風：等我大個洗禮就可以飲耶穌既血
我：係呀，大個洗禮後就得
風：點解要大個先得？
我：因為…你宜家細個囉
風：點解細個唔得？
我：……因為細個唔明耶穌既道理。你明唔明白？
風：我明﹙好堅定﹚
我：﹙心諗無人可以判斷另一人是否真係明﹚。咁要相信主耶穌先得
風：我相信
我：要聽主耶穌既說話
風：我有
我：要做主耶穌既門徒先得
風：我做
我：﹙辭窮﹚等你大個洗禮就可以領聖餐
風：點解宜家唔得
我：……呢個問題真係好難答，不如你問牧師吖。
風：我唔問……我有個方法，不如你飲一啲，分一啲俾我？
我：吓？我唔知得唔得喎……

﹙領聖餐時﹚
風：呢個係耶穌既身體，係唔可以搣爛的
我：﹙其實心裏面想講，耶穌既身體自就為了我們被搣爛，或者當年設立聖餐時祂示範搣爛，但好似太深，放棄了﹚係呀。
風：呢杯係主耶穌既血，係唔可以倒瀉，要拎實
我：係

她好多次好多次好喜悅、雀躍地專注觀看聖餐的餅和杯時，還有非常期待有聖餐，不時問我點解今日無，我答每月一次佢又會問點解唔係次次。我就會好感動。小孩子那種清心和單純的心，成為成年人後真的很難返轉頭。到她長大後是否留在主耶穌裏，我希望會，但世事難料。不過她現在已經享有上主的福份，是無人可奪去的。

提外話，風告訴我，返幼稚園時她掛住我，就會話："主耶穌，主耶穌，我好掛住媽咪。"然後就幫她渡過幼稚園既時間。聽到我都好感動。感謝上主！

世界和平

新聞見到敍利亞一歲孩子被炮彈碎片擊中，單眼留有疤痕和再也看不見這世界。新聞片段還有其它孩子逃跑，哭聲，和大量被炸碎的頹垣敗瓦。風風看著很關心，問我發生咩事。我簡單解釋了。她就說我們祈禱啦。
我：係啦，打仗嗰啲都係壞人，叫天父好勁，打走佢哋。
風：係啦，唔應該打仗。佢哋好似大灰狼大野狼咁壞。要困住佢哋。同埋提無國界醫生幫佢哋。
我：所以世界和平真係好重要。
風：真係唔應該做壞事，應該做好事嘛。

媽媽我好錫你

風：媽媽我好錫你
我：咁點解有時你激死我既？
風：我整蠱你啫嘛
我：咁我應該用咩心情對待？
風：……﹙唔出聲繼續報以甜絲絲笑容，左顧右盼咁﹚

風之禱文

其實自上幼稚園，她的禱文幾乎都是謝飯禱，連睡覺時都一樣。今晚祈禱時，她說唔準我祈，她祈。我說好，順便說爸爸生日，為他祈禱。結果就有以下好溫馨的禱文。

風：親愛的天父，爸爸明天生日，求你俾個蛋糕佢。今晚食咗紅豆糕做甜品，係咪紅豆糕？
我：紅棗糕
風：今晚食咗紅棗糕，我好開心。媽媽唔知點生人bb好，如果唔係就開刀，求你幫助。奉主耶穌名求，阿門。

然後我說我想為伊拉克人祈禱，佢哋地震，跟住佢又俾我祈了。

重要、需要

我：風風，回家後我要即刻拑飯掣。呢件係最重要既事。
風：點解要拑飯掣？
我：因為爸爸返來要食飯，所以拑飯掣好重要
風：拑飯掣唔重要呀，係需要。

唔鍾意爸爸

一早起來，風風發表偉論。

風：媽媽，我好鍾意你，我唔鍾意爸爸。
我：點解你唔鍾意爸爸？
風：爸爸成日話好熱呀好熱呀，睇路呀睇路呀，佢唔鍾意我。
我：爸爸就係鍾意你先想保護你，你唔鍾意爸爸同爸爸唔鍾意你係口同喎。
風：爸爸唔鍾意我，爸爸鍾意你同我既媽媽。媽媽鍾意我。我鍾意媽媽，阿啤同cindy。cindy，阿啤同媽媽都鍾意我。

大家明唔明呢？

搵笨系列

早上爸爸在洗手間。風風刹有介事說有驚喜給爸爸。我問什麽來的，她就是不說。然後爸爸出來了，吃早餐。我說風有驚喜給你。他問風。風說：食完早餐先講。

到換衫趕時間出街了。我們要她換衫。她說未講驚喜。我們著她快些講，趕時間。

風從書櫃拿一本書出來，笑笑口。
風：呢個就係驚喜。你﹙爸爸﹚同我講呢本書😵😵😵😵😵
我們：趕時間，無驚喜。返來再講。

我會照顧細佬

終於知道性別了。風風就快做家姐，要幫手照顧細佬。知道她還要時間適應，但仍然好醒。風風：「張bb床俾細佬啦，我唔要嫁喇。」﹙然後她繼續同媽媽一齊訓﹚

風風：「我會幫手照顧細佬。爸爸照顧cindy。媽媽就照顧我。」﹙所以媽媽仍是她的﹚

記得有朋友講過，孩子任何東西都可以靠自己雙手爭取，惟獨手足之情不可。有了弟弟，你將會學到更多爸媽也教不了的事。將會希望她是你最親密的同伴，正如媽媽和舅父阿姨一様。萬一媽媽一天變了怪獸家長，你們便有兩票幫自己維權。

願你們倆都健康，平安，站在主的道上，領祂豐足的恩典。

襪子與羊

凡事別看表面。其實這裏是可歌可泣的故事。

有一天，我在收衫，風風幫手。她把一隻襪塞入另一隻襪內，湊成一對。然後開始講故事。

風風：呢隻係羊媽媽﹙外面的襪﹚，呢隻係羊bb﹙裏面的襪﹚。羊媽媽會保護bb，大灰狼就見佢哋唔到，唔會食咗佢哋。﹙如是這做了三對襪，她找來衫夾夾住襪口﹚咁就遮住晒，大灰狼就睇唔到了。

之後爸爸回家覺得衫夾夾住襪係多餘，想拆咗佢。就被風風大叫攔住咗。😂

映虹姨姨

上周六帶風風返團契，有位日本宣教士﹙香港人去日本傳福音﹚來分享。風說，我們很耐無見她了。全場得她一個細路，她去了allen sir房要爸爸拿個比卡超公仔來玩，又到影印機附近拿小朋友櫈。全程有時爬有時玩有時不知做什麽。走時她問點解我們叫古映虹，不是映虹姨姨？﹙你細個嘛﹚

然後周日晚，我跟她看坐飛機的故事書，順便提起映虹姨姨現在搭飛機返日本。她說：是韓國，日本不是落雨嗎？

雖然團契間她在玩，但她邊玩又聽著我們的對話，又記得姨姨要在韓國轉機，又記得日本打風可能暫不能回家。

希望映虹姨姨不用滯留太耐，順利平安回家去。

有用的鼻和無用的鼻

風風：呢個鼻有用就唔食
呢個鼻無用就食咗佢
(心諗：咁殘忍既, 好功能主義)
係假嫁，唔係真係食咗佢
我扮嫁啫

小老師

在家中崇拜，宣佈禮成去煮飯。風風走入廚房，說：仲有主耶穌既故事未講。於是我又和老公又坐回廳中。

風：安靜未？要安靜聽。主耶穌話，有好多人愛我哋。
我：﹙等了一會無下文﹚哦。跟住呢？
風：有啲人有屋，有啲人無屋。有啲人既屋俾火燒咗，就無屋。
我：跟住呢？
風：講完喇。
老公：係咪完喇？
風：未得，要叫名分組做野
我：要做咩？
風：分組做功課同傾計，我可以借本簿俾你畫畫
坐咗一陣無反應
風：宜家要收櫈。呢張﹙我坐緊﹚呢張﹙老公坐緊﹚都唔駛收。
老公：你嗰張駛唔駛收？
風：唔駛
我：咁收咩櫈？
風：所以無櫈要收。宜家叫名分組做野。
女仔一組，所以我同你﹙媽﹚一組。咁如果cindy同你一組，我咪無人同我一組，所以cindy同爸爸一組。

唔沖涼的原因

風風：我知道爸爸返工好辛苦，所以讓爸爸沖涼先。我唔沖住。我真係好愛爸爸嫁。

明明係自己掛住食提子唔肯沖涼。呢頭愛爸爸，嗰頭唔留提子俾爸爸。説好的一人一半呢？

念念不忘

晚飯開始，風風已經説飯後食雪糕。我一早聲明不一定每晚都有得食。成餐飯她間中就提起飯後食雪糕。我和老公都堅持未必有。

飯快吃完，開始收碗。風風留起匙羹，說：陣間可能食雪糕用。我繼續說無。食完飯，我叫她抹嘴。她把毛巾放到枱上：陣間可能食完雪糕都要抹嘛。

事到如此，到底她真心不明，定認為訴求多講幾次，必有迴響呢？

到爸爸説收枱喇，並開始行動。風即刻激動問：仲咩收枱？未食雪糕！不讓爸爸收枱﹙使用暴力？﹚，然後想扭計扮喊，叫了一聲。

最最後，爸爸決定拿雪糕出來解決問題。

可惜現實中下一代吶喊不一定被聽見。

哲學家

晚飯時，無聊談天。

我：風風，我覺得你係哲學家
風：我唔係哲學家，我係中學家。
﹙然後她拿起筷子在這隻汁碟打圈﹚
風：呢個係哲學家圓圈﹙筷子順時針攪﹚，呢個係中學家圓圈﹙逆時針攪﹚。所以我唔係哲學家，我係中學家。
爸：佢果然係哲學家，講既野都聽唔明

全部都係爸爸爸

近期風風又會開聲領禱。今晚禱文如下：

親愛既天父，多謝你俾我有好心情。今日爸爸帶我去公園玩，帶我返屋企。爸爸去咗開會。……爸爸負責煮飯。爸爸頭先拎個煲出來，好大聲嚇親我。我想喊，但又好肚餓。唔知喊先定食野先。我都係決定食野先，因為好肚餓…唔…多謝天父我好開心…求主潔淨食物，奉主耶穌名而求，阿門。

後記：飯後我問風，你宜家食飽唔肚餓，可以喊喇。

風：﹙想了一會﹚都係唔喊了。因為食咗好美味既食物，唔駛喊。

禁果與生仔

同風風講阿當夏娃偷食禁果，被趕出伊甸園。風：點解無得留係伊甸園？
我：因為佢哋食咗棵唔食得的果子
風：點解唔食得？﹙呢個係千古難題﹚
我：天父話唔食得
風：食得，所有都食得😵

又另一日。

風：點解雅各有12個仔？
我：因為天父俾好多祝福佢
風：點解天父俾好多祝福佢？
我：唔…唔知呀，可能佢聽話？
風：係咪佢無食﹙伊甸園﹚啲果子呀？

月亮好珍貴

風：睇下？月亮呀！
我：係喎，好靚好圓呀！﹙在廳中已見到銀白色滿月﹚
風：係呀！好珍貴嫁。
我，爸：係呀，好靚呀
風：好珍貴嫁，要二百幾千蚊嫁。

佢之後話，我(媽媽)隻腳好珍貴，值二百幾千蚊，賣咗佢

跟煮野

一日有兩個朋友仔同風風玩，走時媽媽叫他們去厠所後才走。翌日同風出門口，諗住俾啲朋輩壓力她。
我：昨日A和B都係出街前去厠所喎，你去啦
風：我唔跟佢哋嫁。我跟"煮野"
我："煮野"同厠所有咩關係？
風："煮野"即係主耶穌

你肯定早過媽媽講呢啲說話。