不按規矩辦事

今日出街搵朋友食飯，中環繁忙的食飯時間。等車時在街上見到一中年女子很焦急的樣子。再多等一會，她走出馬路攔截一架巴士——因為巴士站位俾小型貨車停泊了，巴士不能埋站。她有她用盡方法衝出去，而隨後是一婆婆推著坐輪椅的公公，大聲叫她算數，根本無可能推到輪椅出去上巴士——因為貨車關顧，她必須先落一級行人路才到達巴士，而婆婆和那女子加在一起可能不夠力。﹙我身體狀況使我也無法推佢一把﹚

然後那女子落了車，巴士開走，我還以為真的無辦法。誰知，那司機把巴士稍為開前約一個巴士身位，在不屬於它的巴士站前停下來。而女子又示意婆婆往前推，她又往前跑去車站，請排隊的人龍讓開。然後她很吃力地和婆婆一起推輪椅上巴士——雖然已經有斜板。

不要等我們都身患惡疾，才發現這城市的無障礙設施仍有改善地方。

不提巴士號碼，因為他的善良，可能隨時又變成不跟公司規矩。本文也不是怪貨車司機，因為他們也真要上落貨，搵食呀。只怪城市規劃，多從商業角度出發，卻從沒考慮所以商業運作都要靠送貨員，而道路設計都係你死你事你諗掂佢﹙例如長長的欄杆，到處是禁區﹚，使送貨者百上加斤。

畫門

昨夜飯後玩水彩，然後我順便油下門牌號數。風風見到又話要畫，但是畫落門度。估唔到爸爸話：你畫啦。抱住風風玩在高高的地方。深藍色的貓是風風操刀，周圍的是貓鬚和有兩隻腳。

事後我問噹生他清潔定我清潔。他：唔好抺住，由得佢。

我會照顧細佬

終於知道性別了。風風就快做家姐，要幫手照顧細佬。知道她還要時間適應，但仍然好醒。風風：「張bb床俾細佬啦，我唔要嫁喇。」﹙然後她繼續同媽媽一齊訓﹚

風風：「我會幫手照顧細佬。爸爸照顧cindy。媽媽就照顧我。」﹙所以媽媽仍是她的﹚

記得有朋友講過，孩子任何東西都可以靠自己雙手爭取，惟獨手足之情不可。有了弟弟，你將會學到更多爸媽也教不了的事。將會希望她是你最親密的同伴，正如媽媽和舅父阿姨一様。萬一媽媽一天變了怪獸家長，你們便有兩票幫自己維權。

願你們倆都健康，平安，站在主的道上，領祂豐足的恩典。

襪子與羊

凡事別看表面。其實這裏是可歌可泣的故事。

有一天，我在收衫，風風幫手。她把一隻襪塞入另一隻襪內，湊成一對。然後開始講故事。

風風：呢隻係羊媽媽﹙外面的襪﹚，呢隻係羊bb﹙裏面的襪﹚。羊媽媽會保護bb，大灰狼就見佢哋唔到，唔會食咗佢哋。﹙如是這做了三對襪，她找來衫夾夾住襪口﹚咁就遮住晒，大灰狼就睇唔到了。

之後爸爸回家覺得衫夾夾住襪係多餘，想拆咗佢。就被風風大叫攔住咗。😂

映虹姨姨

上周六帶風風返團契，有位日本宣教士﹙香港人去日本傳福音﹚來分享。風說，我們很耐無見她了。全場得她一個細路，她去了allen sir房要爸爸拿個比卡超公仔來玩，又到影印機附近拿小朋友櫈。全程有時爬有時玩有時不知做什麽。走時她問點解我們叫古映虹，不是映虹姨姨？﹙你細個嘛﹚

然後周日晚，我跟她看坐飛機的故事書，順便提起映虹姨姨現在搭飛機返日本。她說：是韓國，日本不是落雨嗎？

雖然團契間她在玩，但她邊玩又聽著我們的對話，又記得姨姨要在韓國轉機，又記得日本打風可能暫不能回家。

希望映虹姨姨不用滯留太耐，順利平安回家去。

有用的鼻和無用的鼻

風風：呢個鼻有用就唔食
呢個鼻無用就食咗佢
(心諗：咁殘忍既, 好功能主義)
係假嫁，唔係真係食咗佢
我扮嫁啫

小老師

在家中崇拜，宣佈禮成去煮飯。風風走入廚房，說：仲有主耶穌既故事未講。於是我又和老公又坐回廳中。

風：安靜未？要安靜聽。主耶穌話，有好多人愛我哋。
我：﹙等了一會無下文﹚哦。跟住呢？
風：有啲人有屋，有啲人無屋。有啲人既屋俾火燒咗，就無屋。
我：跟住呢？
風：講完喇。
老公：係咪完喇？
風：未得，要叫名分組做野
我：要做咩？
風：分組做功課同傾計，我可以借本簿俾你畫畫
坐咗一陣無反應
風：宜家要收櫈。呢張﹙我坐緊﹚呢張﹙老公坐緊﹚都唔駛收。
老公：你嗰張駛唔駛收？
風：唔駛
我：咁收咩櫈？
風：所以無櫈要收。宜家叫名分組做野。
女仔一組，所以我同你﹙媽﹚一組。咁如果cindy同你一組，我咪無人同我一組，所以cindy同爸爸一組。