畫家

風：我叫畫家
我：哦，hello畫家豬妹
風：唔係畫家豬妹，係畫家。主耶穌幫我改既
我：哦………

風風遇上掃羅

今日崇拜暨聖餐主日，風風非常留心講台訊息，經文是掃羅在大馬色路上遇見耶穌，而且有許多問題和回應。經文是掃羅在大馬色路上遇見耶穌，並且暫時失明及獲得醫治的事。雖無辦法原文直錄，只能記得幾多寫幾多。

﹙台上講起掃羅和保羅﹚
風：掃羅即係保羅。
我：係呀。
風：點解佢唔同名？
我：因為佢之前做錯事，反省後做啱事就改名叫保羅。
風：點解之前係掃羅？
我：佢一出世爸爸媽媽同佢改名叫掃羅。到佢做識咗主耶穌做啱事就自己改名。
風：即係好似我一出世叫風風，返咗幼稚園就叫xx風﹙全名﹚。
我：唔係，你一出世就係呢個名
﹙重覆討論掃羅保羅個名好多次﹚

﹙台上話掃羅捉信徒坐監，打佢哋﹚
風：點解佢捉住耶穌門徒？耶穌既門徒係做啱事，唔會做錯事，佢唔應該捉佢哋，咁係唔啱嫁
我：係呀，唔啱嫁，佢嗰時唔知道自己做錯
風：係囉，耶穌既門徒係做啱事嘛，掃羅真係唔啱。﹙重覆好多次，風係好怕好人坐監的﹚我哋返屋企係個交叉同剔俾掃羅同保羅。
我：哦，好呀。

風：陣間有奉獻
我：未係，今日有聖餐，之後先係奉獻
風：我見到有奉獻袋
我：﹙本來想話台上無，然後見到聖餐袋有﹚係喎，我都見到奉獻袋
風：我都話有啦。我話陣間有奉獻，無話即刻係

風：等我大個洗禮就可以飲耶穌既血
我：係呀，大個洗禮後就得
風：點解要大個先得？
我：因為…你宜家細個囉
風：點解細個唔得？
我：……因為細個唔明耶穌既道理。你明唔明白？
風：我明﹙好堅定﹚
我：﹙心諗無人可以判斷另一人是否真係明﹚。咁要相信主耶穌先得
風：我相信
我：要聽主耶穌既說話
風：我有
我：要做主耶穌既門徒先得
風：我做
我：﹙辭窮﹚等你大個洗禮就可以領聖餐
風：點解宜家唔得
我：……呢個問題真係好難答，不如你問牧師吖。
風：我唔問……我有個方法，不如你飲一啲，分一啲俾我？
我：吓？我唔知得唔得喎……

﹙領聖餐時﹚
風：呢個係耶穌既身體，係唔可以搣爛的
我：﹙其實心裏面想講，耶穌既身體自就為了我們被搣爛，或者當年設立聖餐時祂示範搣爛，但好似太深，放棄了﹚係呀。
風：呢杯係主耶穌既血，係唔可以倒瀉，要拎實
我：係

她好多次好多次好喜悅、雀躍地專注觀看聖餐的餅和杯時，還有非常期待有聖餐，不時問我點解今日無，我答每月一次佢又會問點解唔係次次。我就會好感動。小孩子那種清心和單純的心，成為成年人後真的很難返轉頭。到她長大後是否留在主耶穌裏，我希望會，但世事難料。不過她現在已經享有上主的福份，是無人可奪去的。

提外話，風告訴我，返幼稚園時她掛住我，就會話："主耶穌，主耶穌，我好掛住媽咪。"然後就幫她渡過幼稚園既時間。聽到我都好感動。感謝上主！

與孩子歡渡聖誕

我：老公，今個聖誕過得舒唔舒服？
他：好舒服呀，唔駛日日逼滿應酬
我：風風，今個聖誕開心嗎？
風：開心到不得了，開心到傻咗

風返了數個月學，終於可休息hea下。返學後和她相處的時間都是做庶務多：起身，刷牙，去厠所，換校服，趕校巴……放學在公園算玩了一會﹙雖然她永遠說不夠，永遠要媽媽陪我玩﹚，然後又是沖涼食飯刷牙瞓覺。放假就每天多了好多好多好多好多相處的時間，還有一起做家務的時間。風主動說幫手掃地，拖地，陪我晾衫﹙孩子肯玩和試就讓他來，千萬不用要求他做得很完美﹚……有時可能扭少少計，但多數都很體貼。怎麽風風就是咁好咁好咁好呢？不過想當年我和弟妹妹都是從小分擔家中大部分家務，當年應該社會大多數都是這樣。﹙話說回來，就是其實媽媽是不用人幫手湊孩子，只要人幫手做家務，讓她有時間陪孩子玩﹚

聖誕也沒特別安排，就是返崇拜，趕起本教會雜誌，和長輩親戚做冬食飯，和英國回來的朋友燒野食，翌日連老公一起在家做家務，除夕和鄰居燒野食，今天又是簡單回氣休息。年紀大，出一日街，留一日在家回氣，令大人和孩子都舒服些。

不過其實聖誕我們主要都在咳，希望新一年新體健康！家中將會多一位新成員，讓我們一家和靠著上主恩典迎接新生活，新挑戰。

今年和風風出席許多教會活動，每次都在想怎麽她能完成呢？當大家忙著安排活動分開大人和孩子，風風就親身示範孩子不一定好嘈，孩子也可坐定定，孩子也會追問講壇上的內容，孩子也可帶給成年人感動，孩子也可幫許多的忙，只要沒有框框，只要對他們有信心，他們可以做的就是很多很多。每次微小的讚美，欣賞他們少少的進步，他們便有更多的可能。更甚，孩子沒有分開做到和做唔到，他們想做，就千方百計做到為止，不是結果成功先行。我就是陪她做想試的事，不會開口就說這樣無可能，行唔通，唔係咁。﹙例子只是千奇百怪的小事，如將5個厠紙筒入在一起，貼很重的物件上牆……﹚

其實唔駛參加突破框框，創意思維訓練，這些都是孩子本身就會的東西。只是在成長期間被大人壓抑下來，然後通識學批判思考，視藝科學創意，再大些又付錢由專家再教。其實係咪一個以十年計的呃錢騙局？