年三十 考試去

年30, 2月17日, 一早考了新聞處的試。無錯! 係年30! 公眾假期! 所以係第一個低能的原因竟然選在這天考! 我當然不恨做, 只是不用錢的考試, 考下無壞。

場地是九龍灣展貿中心。我應考的會場提供800多個座位。有點似古人考科舉。十年寒窗苦讀, 不就是為了一朝中榜, 登入仕途?! 古人今人? 又何分別? 大家都係書生文人, 齊齊考官去。 眼前共有約15位的官, 監看你有沒有出貓, 負責派卷和收卷。政府的確花很多錢請「精英中的精英」來當官的。

試題共3題, 2英1中。

第1題英文叫你看完幾段關於基因改造的食物寫番篇英文summary。即paraphasing。會考定高考的問題形式, 但我想講裏面文法、生字、程度都淺過高考喎。只係想找一個寫到漂亮英文的人。

第2題簡略以天星鐘樓拆的事件, 寫出政府立場 (幾句), 和反對拆卸人士意見 (一句: 保留集體回憶)。最後請你以英文寫出你的意見, 表達如何在發展與保育間取得平衡。sorry! 對佢既前設已經好唔同意。同埋我想問點解出卷員可以咁懶, 多少少資料搜集都唔做? 當呢份卷可以簡單用一句表示反對拆卸天星鐘樓的原因時, 我想講出卷員----新聞官, 真的好無知同膚淺! 這亦代表點解政府永遠都聽唔到亦聽唔明市民的聲音! 無心聽, 點聽到?! 他們就是我們出錢請的新聞官, 政府資訊、遇難, 就是由他們補鑊解畫答官腔。

我答d咩? 我的意見同結論就係政府做的諮詢嚴重不足! 請官員堂上了一課, 多做真正公開、而且打鑼咁同市民講做緊諮詢。不要再只聽地產商同商界的一邊。

第3題係中文題。寫完近期對內地孕婦來港產子問題嚴重, 有本地婦女關注團體來函表示關注。請你代醫管局?/ 醫x衞生處? 忘記了哪部門署長回覆她, 重申政府立場和提出解決方法。好明顯問題已經有一個觀點: 已經設定內地孕婦來港產子是一個「問題」, 而且她們會走數。我有做護士的朋友告訴我, 她任職的私家醫院大部份都是內地孕婦, 她們要先付按金才可入院, 不會走數。新聞幾可看見聽到這些數字?

我答咩? 我用左好官腔的答案回答問題: 例如「本局歡迎 貴團契繼續來電/ 來函查詢」、「本局深明 貴團體的憂慮, 港府早已觀察到有關情況, 早已深入調查研究…」無錯呀! 呢d係你係新聞聽到的答案。點呀?寫得好「靚」既人, 識得耍官腔的, 咪就最可能成為錄取對象。

政府新聞處做什麼? 當然不是客觀中立地發表意見啦。簡單來說, 他們咪就係收政府錢、替政府說話的公關PR, 事事以維護政府 (僱主) 利益、形象為先。有鑊就設計好官方回應來回答記者市民的查問。

最後你或會挑戰我: 咁你講到咁又考?! 之前講過, 考因為吾駛錢, 同埋唔駛返工。填form交表因為張form易填, 吾駛寫履歷、求職信, 求其罰抄咁就抄完一份。同埋我就是想看看它問什麼, 咁我咪又可以係blog多d題材law。