陪狗拉屎

上周三仍是「赫大」的復活節假期。約好友到Pasila食晏。她即興邀我到家中坐。唯一問題是﹕家中有隻101斑點狗, 而且牠好奇心極強, 最愛撲向陌生人。我最怕任何會移動非人類的東西, 從前到有寵物的朋友家, 我都跟寵物保持距離, 牠們一接近我就會彈上椅子或梳化, 從一張椅避到另一張。
我問: 有沒有其他房間趕它進去? 「沒有, 全屋只有一房」
我: 可以關牠入厠所嗎? 「牠太大, 厠所放不下」
但我們還是出發了。朋友的居住地方是有人免費提供, 但間中要照顧屋主隻狗是首要借住條款。一進屋, 不出所料, 一隻好大既101斑點狗拼命衝過來。屋子小, 沒有位置避, 我唯有閉上眼一動不動扮唔知, 即使佢LAM我都可以扮唔覺。朋友好努力拉牠離開, 要牠趴回只屬牠的領土──朋友的床。屋主教她幾招照顧隻狗, 她好努力用食物, 同隻狗講道理, 話我係佢好朋友, 要對我好, 唔好亂郁。狗主講瑞典文, 朋友是越南人, 她學了一兩個瑞典文命令, 但又跟隻狗用英文講道理, 而隻狗又好似聽得明。諗落都好搞笑。
終於安定隻狗。我和朋友可以坐下吹水。開始時我成日用「it」來形容隻狗, 朋友則次次用「he」。咁我都跟佢轉用HE。係芬蘭, 動物係地位好高。芬蘭文「hän」已經包晒he, she, it。但呢個「it」只係可以形容生物。死物「it」係有另一個字「se」。係芬蘭, 人和動物地位係同等。動物同死物分得好清楚。
狗主遲遲未返, 隻狗到痾屎時間, 而佢又只會係戶外痾。咁就弊喇。朋友從未單獨帶過佢痾史, 又話隻狗一跑佢都拉唔住。有一次隻狗一見女仔, 就撲埋去, 朋友拉都拉唔住。佢好驚, 我仲驚。但唔通呢個時候走咩, 我地惟有硬住頭皮上。
朋友一拿狗帶, 隻狗超興奮。仲擺好姿勢上鎖。我完全無經驗, 仲以為動物最討厭被野纏住。出門口了。隻狗唔識行樓梯, 朋友帶佢搭電梯, 我行樓梯。一落樓, 隻狗已經好興奮咁四圍行。朋友用力拉住佢行慢些, 我跟在後。每逢牠行埋嚟, 我就行遠D。佢四圍聞, 聞完又唔痾, 聞咗好多好多好多地方, 左揀右揀先行去。雖然知道狗尿是霸地盤, 所以沒有味佢先會去。我跟在後面, 心裡暗罵佢十幾廿次, 想佢快D完事。點知佢姿姿整整, 激死人。見佢終於痾第一泡尿, 我以為這就完了。原來狗每次去厠所唔止去泡一次(人係咁嘛), 仲有好多泡另要等牠痾屎。
隻狗亂咁行, 我和朋友都無辦法控制佢既路線。佢偏離行人路行, 往山坡愈行愈出。那裏四圍都是狗屎, 我好唔想行入去。還是行了。但隻狗好似唔知咩叫跌落山, 係咁拉我朋友走。我跟朋友說, 要拉佢番轉頭, 唔係我驚你會跌落小山坡。但隻狗力氣大, 朋友拉佢唔住。煞到埋身, 唯有一起齊拉, 但隻狗好重同大力, 超驚。跟住我好惡咁第一次大叫隻狗個名。佢呆一呆, 然後似乎聽話走回來。朋友說佢聽我話, 我話因為夠惡同大聲。
然後我地無何奈何繼續被隻狗帶來帶去。佢又遲遲唔痾。間中我又出手同朋友一齊拉住佢。每逢有人經過, 我地即刻用食物引開佢注意, 或用我地既身體遮住佢既視線。
佢又行埋雪堆度掘雪洞 (雖然回暖, 但雪未融晒)。而且佢掘洞既附近都有其他雪洞, 洞中有狗屎。咦! 點解狗要係雪堆掘洞先去呢? 點知佢掘掘下, 聞聞下, 又離開。心想﹕唔該你快D啦! 痾屎都揀三揀四, 好煩呀! 到最後佢又行入另一個地方, 右掘掘, 左掘掘, 終於搞掂。大功告成!但當我繼續向前行時, 佢已經停咗係大廈門前。好明顯, 佢認路係叻我好多。
係室外每多一秒, 我個心就驚多一秒, 一邊帶狗時我都一邊祈禱, 希望佢唔好亂來。終於有驚無險番屋企。生平首次帶狗痾屎, 仲要同未學滿師的朋友一起, 驚險重重。朋友說好在有我, 不然佢一個人實驚死。我心想還是感恩。上帝總是有預備。
後記﹕之前有朋友寫一個婆婆係醫院想有尊嚴咁痾屎, 失敗咗。這次我才發現狗痾屎都有尊嚴, 有規距。大開眼界!